Gen 30 | NdeIBE | STEP | URakheli wathi ebona ukuthi wayengazaleli uJakhobe abantwana, wasekhwelezela udadewabo. Wasesithi kuJakhobe, “Ngizalisa abantwana, ngoba kungaba ngcono ngihle ngife!”

Genesis 30

1 URakheli wathi ebona ukuthi wayengazaleli uJakhobe abantwana, wasekhwelezela udadewabo. Wasesithi kuJakhobe, “Ngizalisa abantwana, ngoba kungaba ngcono ngihle ngife!”

2 UJakhobe wamzondela wathi, “SenginguNkulunkulu mina, onguye okuvalileyo ukuthi ungazali?”

3 Yena wasesithi, “Nangu uBhiliha incekukazi yami. Lala laye ukuze angizalele abantwana, ukuze kuthi ngaye ngibe lemuli.”

4 Ngakho wasemupha incekukazi yakhe uBhiliha njengomfazi. UJakhobe wembatha laye, 5 wakhulelwa wamzalela indodana. 6 Yikho uRakheli wathi, “UNkulunkulu usengigezile; ulalele ukuncenga kwami wasenginika indodana.” Ngenxa yalokhu wayitha wathi nguDani.

7 Incekukazi kaRakheli, uBhiliha, yathatha isisu njalo yazalela uJakhobe indodana yesibili.

8 URakheli wasesithi, “Kade kuyimpi phakathi kwami lodadewethu, mina senginqobile.” Wasemuthi nguNafithali.

9 ULeya wathi ngokubona ukuthi kasazali wathatha incekukazi yakhe uZilipha wayipha uJakhobe njengomfazi. 10 Incekukazi kaLeya uZilipha yazalela uJakhobe indodana. 11 ULeya wasesithi, “Yinhlanhla enganani!” Wamutha wathi nguGadi.

12 Incekukazi kaLeya uZilipha yazalela uJakhobe indodana yesibili. 13 ULeya wathi, “Uthi ngiyathaba yini! Abafazi bazakuthi ngiyathaba.” Yikho wambiza ngokuthi ngu-Asheri.

14 Ngesikhathi sokuvuna ingqoloyi uRubheni waya emasimini wafumana izihlahlana zamamandraki waziletha kunina uLeya. URakheli wathi kuLeya, “Ngicela ezinye zezihlahlana zendodana yakho amamandraki.”

15 Kodwa wathi kuye, “Kakukwanelisanga na ukuthi wangemuka indoda? Usufuna ukuthatha lamamandraki endodana yami njalo?” URakheli wathi, “Kulungile, angazalala ngakwakho lamuhla ukuze ngizuze amamandraki endodana yakho.”

16 Yikho kwathi uJakhobe efika evela emasimini ngaleyontambama, uLeya wamhlangabeza wathi, “Kumele ulale ngakwami lamuhla. Ngikuqatshile ngamamandraki endodana yami.” Ngakho wembatha laye ngalobobusuku.

17 UNkulunkulu wamlalela uLeya, wathatha isisu wazalela uJakhobe indodana yasihlanu.

18 ULeya wathi, “UNkulunkulu usengivuzile ngenxa yokuthi nganika indoda yami incekukazi yami.” Ngakho wamutha wathi ngu-Isakhari.

19 ULeya waphinda wasithatha njalo isisu wazalela uJakhobe indodana yesithupha.

20 Yikho uLeya wathi, “UNkulunkulu usengiphe isipho esiligugu. Khathesi umkami usezangiphatha ngenhlonipho, ngokuba sengimzalele amadodana ayisithupha.” Wasemutha wathi nguZebhuluni.

21 Ngesikhathi samuva wazala intombazana wayithi nguDina.

22 UNkulunkulu wamkhumbula uRakheli; walalela kuye wavula isizalo sakhe. 23 Wathatha isisu wazala indodana, wathi, “UNkulunkulu uselisusile ihlazo lami.” 24 Wamutha wathi nguJosefa, wathi, “Sengathi uJehova angangengezelela enye indodana.”

Imihlambi kaJakhobe Yezimvu Iyanda

25 URakheli esezele uJosefa uJakhobe wathi kuLabani, “Ngivumela ukuthi ngibuyele elizweni lakithi. 26 Ngipha omkami labantwana, engibasebenzeleyo kuwe, ngihle ngibambe indlela. Uyawazi umsebenzi engiwusebenzileyo kuwe lapha.”

27 Kodwa uLabani wathi kuye, “Uma ungithanda, hlala. Sengibonile ngokuhlahlula ukuthi uJehova ungibusisile ngenxa yakho.”

28 Wengeza ngokuthi, “Qamba loba yiyiphi inkokhelo oyifunayo, ngizakupha.”

29 UJakhobe wathi kuye, “Uyakwazi ukuthi ngikusebenzele njani lokuthi izifuyo zakho ziqhube njani ziphethwe yimi. 30 Okuncinyane owawulakho ngingakafiki sekusele kwanda kakhulu, njalo uJehova ukubusisile langabe kungaphi lapho engike ngaba khona. Kodwa manje ngizaze ngiwenzele nini mina umuzi wami ulutho?”

31 Wabuza wathi, “Ngikupheni na?” Waphendula uJakhobe wathi, “Ungangiphi lutho. Kodwa ake ungenzele lokhu kodwa, ukuze ngiqhubeke ngisondla imihlambi yakho:

32 Wothi ngingene emihlambini yakho lamuhla ngikhuphe kuyo zonke izimvu ezilamachatha kumbe amabala, lazo zonke ezimnyama lezimbuzi zonke ezilamabala kumbe amachatha. Yizo ezizakuba yinkokhelo yami.

33 Ngesikhathi esizayo ubuqotho bami buzavela nxa uhlola inkokhelo onginike yona. Ingqe yileyombuzi engizabe ngilayo engelamachatha kumbe amabala, loba lizinyane lemvu elingamnyama liyabe lebiwe.”

34 ULabani wathi, “Kulungile, kakube njengokutsho kwakho.” 35 Mhlalokho wazikhupha zonke izimpongo ezazingamaqamule kumbe ezilamabala, njalo lezibhuzikazi ezilamachatha kumbe ezilamabala (zonke ezazilokumhlophe kuzo) lamazinyane ezimvu wonke amnyama zonke wathi zikhangelwe ngamadodana akhe.

36 Wasesuduka kuJakhobe okommango ongahanjwa izinsuku ezintathu, kodwa uJakhobe wabe elokhu esondla yonke imihlambi eseleyo kaLabani.

37 Kwathi uJakhobe wagamula izingatsha zesihlahla sephopla leze-alimondi lepulane wahamba ezixoza amaxolo wenza imidwa kwavela kuzo isigodo esimhlophe. 38 Izingatsha lezi ezixoziweyo wazibeka kuyo yonke imikolo yokunathela imihlambi ukuthi zime ziqondane lezifuyo nxa zinatha. Kwakusithi lezozifuyo ezidabuleyo zizonatha 39 zifike zixakane phambi kwezingatsha. Zazizala amazinyane alamabala ayimidwa loba alamachatha kumbe amabala nje. 40 UJakhobe wawakhetha wawabeka wodwa amazinyane, kodwa lezo ezinye waziyekela zadunga lezo ezingamaqamule lezimnyama ezazingezikaLabani. Ngaleyondlela wenza imihlambi eyahlukeneyo eyakhe kaze ayihlanganisa lekaLabani. 41 Kwakusithi kungadabula izibhuzikazi eziqinileyo, uJakhobe wayefaka izingatsha emikolweni phambi kwezifuyo ukuze zixakane eduze kwezingatsha,

42 kodwa nxa lezozibhuzikazi zazingezibuthakathaka wayengazifaki izingatsha. Yikho izifuyo ezibuthakathaka zaba ngezika-Labani, eziqinileyo zabuya ngoJakhobe.

43 Ngale indlela indoda le yanotha kakhulu yaba lemihlambi emikhulu, lezincekukazi, lezinceku kanye lamakamela labobabhemi.